《Rewire-神經可塑性》讀後感

你有冇試過，當個腦放空嘅時候，忽然之間有一首歌或者一段旋律，好似入咗單曲循環 mode 咁，不停咁 loop？ ​如果係一首你鍾意，或者好 relax 嘅音樂，可能你會諗，正呀！我連 Spotify 月費都可以慳番！ ​但如果 loop 嘅唔係一首歌，而係一幕幕好觸動到你情緒嘅畫面呢？ ​可能係尋日你上司鬧你做錯嘢啦，或者係你同前度嗰啲分手對白，甚至係你自己一啲好 harsh 嘅 self-talk。 ​嗰一刻，你實會想即刻搵出個腦入邊嗰個 stop 掣，叫佢唔好再播呢啲畫面！ ​但係我想邀請大家做一個思想實驗，喺嚟緊嗰 5 秒，請你千祈唔好諗起葉劉淑儀、著住紅色旗袍、同你拜年嘅畫面。拿，我哋數 1、2、3、4、5。 ​你反而會發現，港大美女請你食年糕嘅畫面，會立即好清晰咁浮現喺你腦海入邊！ ​當你越係想同自己嘅諗法或者情緒對抗，反而越係會令呢啲諗法更加清晰。 ​所以呢，我今日想同大家分享嘅呢本書，就係作者用腦神經科學嘅知識，去帶領大家一齊搵出個腦入邊嗰粒 unsubscribe 掣，停止大腦再反芻呢啲畫面，教大家點樣改寫腦入邊，關於自己人生故事嘅方法。

姐姐及YT大哥聲音演繹版 https://youtu.be/R5memNNNQ4g?si=GmI3avmVlQZ3DwAn

​今日想分享嘅呢本書叫《Rewire》——神經可塑性。 ​喺人類嘅歷史入邊，有好長時間我哋都係住喺山洞嘅原始人。人無其他動物咁強壯，但個腦比其他動物大好多，所以可以思考、學識用工具，甚至建立部落。 ​但係活喺弱肉強食嘅大自然，原始人嘅首要條件，就係我哋要生存！ ​所以人腦有一個最原始，好多動物都有嘅系統，叫做邊緣系統。佢唔會用 logic 去思考，佢嘅語言係感受：快樂、恐懼、痛苦。佢嘅特點就係好「快」，同埋隨時 ready 去控制成個身體。 ​例如見到有隻野豬衝緊埋嚟，佢會話：「我好肚餓！勇敢啲同佢死過！咁就有晚餐食啦！」 ​然後有隻獅子行過呢，佢好快就會講：「嘩大佬搞唔掂！好驚呀！唔快啲走就會死㗎喇！」 ​跟住返到部落，見到有個靚女，佢又會講：「嘩呢個人生得咁靚！你一定要同佢生個 BB！所以我會令你每次見到佢都覺得好開心。」 ​呢啲反應雖然快，但佢唔識得分析，唔識得諗長遠計劃，亦都唔識得去估自己以外嘅人諗緊乜。 ​所以真正令人類獨特嘅部份，係我哋喺最原始嘅邊緣系統上邊，僭建咗另外一層，叫做「大腦皮層」。而我哋額頭呢個位呢，叫做前額皮質，就係負責思考、分析、組織，甚至可以叫我哋嘅情緒系統唔好咁活躍住。佢係一個「智者」。 ​但問題係，佢行得好慢，要時間去諗，之後先會行動。 ​聽到呢度大家都發覺，其實人個腦 24 小時都有咁多嘢要做、要諗，會消耗好多能量。所以大腦有啲偷雞方法——其中一個就係開著個自動波 mode。 ​喺呢個 mode 入邊，我哋個腦會無意識咁，斷斷續續播返啲我哋自己對一段記憶嘅演繹，亦即係最開始講嘅「反芻」。例如同 ex 嗰啲分手對白。 ​我哋大腦位「智者」知道呢啲只係過去嘅回憶。但對邊緣系統嗰位「看更」嚟講，佢淨係知呢個片段激起好多痛苦、傷心同埋焦慮。 ​所以佢即刻拉起個警報，同你嘅身體講：「我哋依家好危險！智者你暫時 shut up！唔好諗嘢住！」 ​問題就係，大腦仲有另一個偷雞慳力嘅方法：如果一個刺激、情緒同埋行為經常一齊出現，佢會令呢幾樣嘢之間嘅連結越嚟越緊密，亦即係所謂嘅 wiring，痴住咗條線。越重複得多呢個 pattern，對大腦嚟講，呢條路就越容易行，而個腦就最鍾意行呢啲捷徑。 ​好，依家我哋返去腦入邊個「看更」拉警報嗰下。因為嗰刻嘅情緒就係傷心、痛苦同焦慮，所以大腦就立即搵晒以前傷心、痛苦同焦慮經歷過嘅事出嚟。於是就即刻 jam 住喺呢個惡性循環入邊，走唔返出嚟！ ​咁到底點做，先可以打破呢個循環呢？呢個就係我睇呢本書覺得最大得著嘅地方。佢叫做 Meta-cognition，後設認知。 ​就係人腦唔止識得諗嘢，仲可以退後一步，抽離出嚟去認知到：「哦！我原來喺度諗緊呢樣嘢。」呢一份察覺就係打破循環嘅關鍵！佢喺刺激、情緒、行為之間，爭取到幾秒嘅空間。呢幾秒有咩咁重要？ ​第一：當我哋認知到「咦？我又喺度反芻啦喎。」意識到呢個諗法令我有呢個傷心嘅感覺。但嗰刻就好似隔住個 mon 睇戲咁，退後咗一步，唔再俾呢啲情緒淹沒，變成咗一個觀察者。 ​第二：因為打斷咗嗰個自動波嘅循環，我哋可以有意識咁改寫內心故事。可以好似安慰一個好朋友咁對自己講：「我依家好傷心，但係傷心係一件好正常嘅事，我會陪你一齊面對。」 ​第三：當安撫咗俾情緒 take over 嘅大腦嗰陣，我哋嘅「智者」大腦就可以選擇做另一件事。例如，比起去不停碌 Instagram 同 Threads，可以選擇放低部電話，深呼吸，落街行個圈。 ​每一次我哋重複呢個察覺、安撫、選擇行動嘅過程，就好似喺大腦入邊嗰條痴晒線嘅痛苦循環隔離，開闢另一條平靜、充滿力量去改變，而唔係沉溺嘅路。令自己唔再反芻，真真正正咁 unsubscribe 嗰段痛苦嘅回憶。呢個過程，就係 Re-wire 神經可朔性！